最近睇巴黎奧運，發覺冠軍攞金牌的運動員，技術唔一定最好，但係心態一定係最穩定；就算處於逆境劣勢， 差一分會輸比賽， 一樣可以支持到最後反勝一刻。
創業其實都係一樣，保持逆向思維，以自己的優勢出發， 就算對手規模比你大，價錢比你平， 一樣可以搵到你獨有的優勢 (Edge)。💪
例子：
一人創業：
無錯， 人手只有你自己一個， 但係你擁有大公司無既彈性，客戶有特別要求？ 無問題，今日可以修改， 即日可以發佈；
大公司需要一星期完成既工作，你一天可以立刻發佈， 因爲你唔需要等上級批准，亦唔需要等其他同事；你唔需要等任何人既指示。
今日既諗法唔同左，今天的我打倒昨日的我？咁又有咩問題？ 無人會批評你， 只要你覺得係啱既，可以即刻做， 無何任包袱，起碼唔需要開會問老闆意見。
客戶一個電話／電郵， 可以直接搵到公司老闆？你既一人公司可以做到， 全世界大部份公司都做唔到。
=> 缷去公司的規模，一人創業者的彈性， 無任何競爭對手可以匹敵。
唔夠人手：
承上，唔夠人手咁咪唔好做太多工作，想一次做晒桌面網站，手機網站，iOS，Android Apps？但係唔係時間開發?淨係做桌面／手機網站又得唔得? 唔得又點解唔得， 必要性係咩？
既然唔夠資源，可唔可以試下單點突破，淨係發佈一個網站試下? 甚至乎網站都唔需要開發呢? 淨係開個ig / threads 帳戶宣傳可以嗎?
=> 唔夠人手, 令你集中只可以喺最重要既工作 (move the needle)
產品沒有太多功能, 追唔到競爭對手既水平：
既然無咩功能，你既最大優勢就係產品簡單易用；如果你係其他新創產品既早期試用者，你會發現好多產品早期既賣點，都係簡單易用。
點解？因爲一開始資源唔夠，根本做唔到太多功能，所以最大特色就係版面比較少掣，咁版面少掣自然會變得易上手，成個頁面白色一片，咁好難會唔識用。
相反， 由於大企業產品功能太多，介面太多資訊，好多用戶都會覺得產品難用，經常去錯另一頁面，又唔知點樣可以做到正確設定， 最慘係客戶支援又要經過重重難關先搵到。所以太多功能， 好大機會係既有市場佔有者既核心劣勢，而大手砍掉現有功能，係好難做到既， 因爲現有用戶一定會投訴。
=> 創業者的第一個優勢，產品可以做到簡單易用 🤓
價錢比人貴，競爭對手比你平， 甚至乎推出免費版本搶客
價錢比其他人貴，咁要問下自己既比較優勢係咩？你比其他人畀多左咩價值? 好似香港餐廳比深圳餐廳貴， 咁香港餐廳有咩勝人一籌? 可以係比較好既服務，食品比深圳健康或者安全。
至於競爭對手推出免費版本吸客，燒錢短期內可以做到， 長期則唔可以持續。假設你既產品需要用到付費版Chatgpt API，需要提高收費，至於對手決定提供免費Chatgpt 對接， 呢個情況下，你應該專注改善核心服務，加強支援重度用戶；至於對手想燒錢流血不止，你咪由佢吸納多啲貪平既免費仔， 不想付費既用戶終歸不會付費。
=> 你需要既係付費客戶，唔係免費用戶 🤑
無錢？無錢既狀態亦可以係一種心理優勢
一個常見既創業謬誤係，「 我無錢所以我不能創業」。
香港本地市場佔９成都係中小企， 人數少於幾十人內，如果以上假設係正碓既話，照計呢９成中小企都唔應該存在。
好少人理解到無錢既心理優勢， 就係你每一分錢都會花喺刀口上，因爲你無得揀，每一分錢都一定要有回報；如果唔係， 你好快會成爲執笠group 既一分子。
所以你每一個決定都會變得最有效率， 反觀點解咁多富二代創業失敗，因爲佢識洗錢， 唔識賺錢。
=> 新創事業未必需要巨量啟動資金，反而要學懂問客戶攞錢 💰
結論：
現實條件只係客觀事實，點樣面對狀況，先至係你既主要工作
