沒有好橋,可以怎樣找到一個可行創業大計?

Facebooktwitterlinkedinmail

如果無橋,係咪代表唔可以創業呢?

答案當然係NO,無idea 一樣可以用有系統既方法搵到你既創業大計;作爲一個科技創業者,我自己試過不同的方法去實試唔同idea,有啲可行,有啲完全失敗,但係要搵一條賺到錢既創業概念,係完全可行,一個普通人都做到。

有咩方向可以搵到你既idea?

  1. 從自己既問題出發
    如果你以往既工作曾經遇到一些問題,你自己又好想解決既,咁可以研究下有冇現有方案。如果你可以搵到現有產品解決你既問題,有一個市場存在,咁你既idea 已經證實左係可行,因爲有一堆客戶畀緊真金白銀買一個解決方案,問題係你有冇一個切入點去進入市場,好似特別既功能,介面簡單易用,特別技術,甚至係你認識好多現有客戶 (Network),可以短時間內打入市場。

    如果你既問題搵唔到解決方案?咁你要睇下點解會無人做呢?互聯網去到今時今日已經好發達,你諗到既idea,好大機會有好多人已經諗過甚至試過實行,咁點解會無人做呢條橋,有咩阻力存在?會唔會係無人肯畀錢去解決問題,個個都係口爽荷包立?如果你搵到個阻力,係只有你先可以解決到,咁可以去下一步測試下有冇得做
  2. 從別人既問題出發
    我自己都唔係擅長從自身搵創業好橋,因爲好多問題都可以自己用技術,或者work-around 解決,好多問題我自己都唔覺意忽略左,過一段時間又會見到有新創提供解決方案。

    咁我點樣搵到做SaaS 產品既idea?當我做第2個Shopify app之前,我用左大約3個星期時間去瀏覧Shopify community (註:一個開網店平台既用戶論壇),每日我都睇下用戶有咩問題,有咩問題值得留意,有咩問題有客戶好想付費解決;有咩問題同我自身背景有關聯,有優勢去創造一個解決方案;有冇現有解決方案;現有市場競爭大唔大,競爭對手強唔強,自己一個人有冇可能打得入市場,勝算有冇6,7成;問題重覆次數多唔多,如重覆次數多又有用戶肯付費,咁就代表你已經搵到一堆潛在客戶,可以有辦法賣到錢。

    如果你未做任何實際開發工夫,而你已經搵一堆潛在客戶肯幫襯,咁你失敗既風險已經降低左好多;未做先賣,可以立於不敗之地。

真係諗唔到idea,咁可以點?

真係搵唔到好橋,仲可以抄人地條橋,你有錢都可以收購現成既小型產品,慳番唔少時間; 有人話抄人橋咁咪好卑鄙?咁百佳惠康開到周圍都係超市,唔通我唔可以開超市咩?人地做得,點解我又唔做得,咁我又犯左咩法?侵犯版權?咁我自己用自己方法從新做一個改良版本,侵犯左咩版權?

“Good artists copy, great artists steal.”

Steve Jobs 同Picasso 都係咁話,無人話一定要好創新,先叫新創架

點樣確保可以成功到第一步,搵到頭10個客?

下次有機會再講下點樣減低產品風險,好似Small bets 概念,12 Startups in 12 months,點用Life Time Deal (LTD)預售產品,問客戶籌集第一桶金。

無錢?唔緊要,仲可以空手入白刃 😛

Posted in Startup | Leave a comment

搞Startup 一定需要天使投資者嗎?

Facebooktwitterlinkedinmail

最近上連登討論區睇到呢個主題,想討論一下:香港搞startup幾乎冇angel investor

究竟創業需要巨額資金嗎?一定需要搵投資者支持嗎?

如果你係創立一個高資金門檻既生意,好似開茶餐廳要投入資金去租金裝修請員工,要投入資金買材料買機器,咁係的確有需要外求資金。

但係如果你創立科技生意好似SaaS (Software as a Service),一個月成本講緊只係幾百蚊,包括伺服器,電郵,域名等等,最大支出只不過係你自己既人工。起動資金可能一,兩萬蚊已經足夠玩一年;前題係你自己要有基本動手能力,咁如果你乜都唔識既話,我建議你應該提升一下自己既動手能力,再考慮下一步發展。

謎思 1:伺服器,原料好貴?

時下伺服器成本已經大幅下降,你可以用Digital Ocean (DO), Hetzner, Linode, Vultr 等雲端伺服器供應商,以一部1 vCPU, 1GB RAM, 25GB SSD 的伺服器爲例,DO一個月收費爲$6美金,足夠運行一個小規模網站,如你的MVP 或示範應用,每個月畀一餐飯既價錢已經足夠。

如果你的公司爲新創,某啲雲端伺服器供應商都有設立新創支援計劃,申請成功可以得到一定的credit 在2年內使用,我自己有用過Aws / Digital Ocean的新創計劃,等如頭2年免費設立伺服器。

除左伺服器,軟件開發無咩原料硬件成本,最貴應該係你自己用黎工作既電腦,同埋你自己既人工同埋時間。

謎思 2:App開發人員成本好貴?

第一件事,要問下自己點解要一定開發App?點解要分開搞iOS/Android,搞左一個iOS平台先得唔得呢?用一個網頁取代得唔得?點解一定要開到咁大個頭?

凡事問多d what-if 自己係錯咁點,用反向思維,如果用一個低成本既方本可以達到目標,慳到時間,咁係咪一定要用一個高成本既方法呢?如果真係要用做晒iOS/Android,又有冇辦法可以搵到早期客戶補貼早期開發資金呢?

如果你覺得香港生活成本好貴,有冇考慮去外國旅居一段時間,減輕生活成本?外國有好多數碼遊牧 (Digital Nomad)居住喺泰國,印尼,越南等等,每個月生活成本爲幾千蚊港元,已經足夠生活,有興趣可以參考Nomad List 睇下外地旅居既生活成本。

謎思3:香港無VC?無天使肯投資?

如果你覺得香港無適合既投資者,咁咪唔好搵投資者,可以用Bootstrap (資金不求人) 既方法去達到最低生活水平,外國bootstrap創業者叫呢個目標做Ramen Profitability,意思就係每餐食杯麵支撐到既收入水平,邊個話搵投資者搞到上市係唯一既創業方法?點解一定要跟人地既方法?

結論

如果你睇到呢度都覺得一定要搵投資者,我會建議你唔好搞呢條橋,轉去另一條平靚正既橋,因爲搞startup最緊要有Founder-Market Fit,條橋未開始都咁棘 (Kick),咁不如搵另一條易行既好橋啦,世事無謂勉強

Posted in Startup | Leave a comment

一個人在香港可以創業嗎?

Facebooktwitterlinkedinmail

有好多人話香港創業成本高,舖租人工高,好難發展。咁今時今日一個人創業,仲有冇可能成功呢?

我自己覺得可以,前題係

  1. 必須選擇利潤高的範疇,如SaaS (Software As A Service),digital products,電子報等等,利潤高代表你不需要太多客戶都可以養活自己,做少啲野,但係可以收多啲錢;70% – 90%利潤係合適既水平,10% – 20%利潤既生意代表你得個做字,無咩錢落到袋
  2. 繼承1,利潤高之係要有低營運成本,唔駛交貴租貴裝修
  3. 必須有自己既門檻或者細分市場,有Founder-Market Fit,有自己諗法無咁易被人抄到,至少唔會有成條街既競爭對手同你做爛市
  4. 有槓桿(Leverage),由於一個人時間有限,唔會夠時間做晒所有工作,代表你要放棄營銷或者產品的一剖分;如果選擇放棄一部份營銷工作,可以選擇加入現有平台如Chrome Web Store, Google Play, Apple AppStore, WordPress Plugin Directory等等。利用現有平台流量,節省自己經營時間,如果自己一個人要兼顧營銷, 產品研發加埋其他營運問題,太難喇

係咪一定要raise fund(集資)呢?

第一件事應該問你自己點解要集資?如果你想一個月賺到幾十萬港元,咁自資係絕對無問題嘅,只要你肯接受頭一,兩年緩步發展。如果你要集資,代表你一定要畀回報投資者,你一定要賣盤或者上市,否則你點畀回報投資者?

有呢啲咁好idea咩?

都有好多架,好以呢個BoringCashCow 網站,外國有好多獨立開發者(indie developers),一年都可以做到六位數美金營業額,重點係選擇比努力重要,選擇一條自己比人跑得快既跑道

咁我諗唔到好橋咁點呀?

咁咪唔好諗囉,直接收購現有產品,或者抄人概念再快速發大黎做,等如人地喺街市賣豬肉,無理由唔畀我賣埋一份架?我想賣全天然既健康豬肉產品又得唔得呢?

Posted in Startup | Leave a comment

創業L

Facebooktwitterlinkedinmail

最近睇左填詞L 呢套電影,阿詩以填詞人爲目標,希望可以成爲全職填詞人,可以有派台歌,攞到填詞人獎項

難得我耗光一世努力才放棄,曾花過力氣不過未令人銘記

兩句歌詞概括好多人創業既心路歷程,自己創業十幾年,好彩仲叫搵到兩餐

無錢出糧,公司接近解散,每日喺失敗邊緣徘徊根本就係創業L 既家常便飯;我都數唔到失敗過幾多次,因爲已經多到唔記得,都唔係咁在意;到宜家呢刻,我覺得可以坐喺電腦前面繼續開發產品,咪已經理想達到囉,咩奬項全部唔重要

由你坐喺枱前填詞個一刻,導演你既理想已經達成左,只不過你從來無爲意到,我諗大部份人都無爲意到

由你發佈產品個一刻,有幾個人試用,你已經達成理想,因爲現實世界9成人都係做唔到

所以我每日坐喺電腦前面都係博盡無悔既,十幾年前係,今日都係

Posted in Startup | Leave a comment

阿B的喪禮

Facebooktwitterlinkedinmail

HKSCDA 貓舍 的PR狗終於走左喇

黎左貓舍3,4年,說來奇怪,貓舍的狗阿B 是最長年資的住客,由我第一日服務以來,阿B 已經是貓舍的長期住客;有貓被接走,有貓病逝,唯獨阿B 一樣攤喺貓舍大廳迎接大家;當我心情唔好個陣,阿B 會善解人意地陪伴在旁

今日係阿B的喪禮,黎到善終公司,心裏已經接受了現實,但係喺現場見到阿B,身體冰冷同埋明顯變細左,心裏仍然覺得好難過,好在阿B終於唔駛被病魔折磨喇,最後目送佢火化,心裏釋然,覺得一切都完結

諗過努力工作有用嗎,銀行戶口有幾多位數,公司頭銜是高層?最後都係敵唔過死亡,咁努力的意義係咩?

阿B 今日教識我生命有限,以上全部都唔重要,重要既係你今日做啲咩野,有冇珍惜每個當下,過好每一天

再見了,阿B,有緣再會

Posted in 個人 | Leave a comment