唔夠錢喺香港請人? 仲可以去海外請遙距員工

Facebooktwitterlinkedinmail

随住我的SaaS 應用客戶越來越多,客服的工作量變大,每日都花好長時間應付客戶提問,一直想請個客服人員幫手,但係喺香港請客服人員,一個月成本大約HK$20 – 25K,英文水平唔係咁可靠,又唔知可唔可以做得耐,一直思考點樣可以解決呢個問題;最後比我發現左,可以去菲律賓請遙距海外員工(remote worker),成本大約每月US$600 – 1K,由於菲律賓人生活經常用英詞對答,所以英文水平一般唔錯,而且菲律賓曾經爲美國殖民地,所以應對美國客戶經驗豐富,就算提供實時客戶支援都可以應付到(當然要睇你既要求啦)。

好多歐美企業其實已經喺菲律賓開設客服中心,要請有經驗既員工一啲都唔難。另外,由於當地經濟唔好,要搵似樣既工作係唔容易,Work From Home (WFH) 既遙距工作對當地人黎講都好吸引。

去邊度可以搵到求職者?

可以去onlinejobs.ph,一個比較受當地人歡迎既網站,你可以當係菲律賓版既Jobsdb,出招聘廣告一個月爲US$69 – 99美金,當你請到人可以即時取消訂閱費,網站都鼓勵你咁做。

我自己既經驗:一出廣告,即刻有人投電郵應徵,兩日內收左過百個CV(唔知係咪因爲香港請好多菲傭姐姐,香港公司相對穩陣),由於應徵者程度比較參差,我用Google Form設立一個小測試,睇下佢地既英文同埋基本知識如何,但係要小心好多人會用chatgpt 求其搵答案,要諗定一啲難搵答案既題目,好似比較近期既問題等等。

請人既成本同香港比較?

請菲律賓遙距員工,一般係當佢地係合約員工,所以唔駛處理MPF 勞保既問題(我都唔識點買到),頭3個月一樣可以當係試用期,但係頭2個月可以每2個星期出糧,因爲好多當地人驚被人走數,同一時間,你想轉人都唔駛咁有hard feeling。

除此之外,菲律賓請遙距海外員工,會要求聖誕前出13個月糧,呢個據說係法律要求,同埋當地人聖誔都會洗費大左,例如要買禮物畀屋企人,所以早少少出糧會方便佢地。第13個月糧可以當係成本既一部份。

至於假期,就睇你點安排,我當係普通同事,一年照樣安排12 – 14日假期,另外加埋病假;始終係合約員工,如果有濫用既情況,你可以喺合約寫明一個月通知解除合約。

點樣確定員工既技能水平?

睇CV 其實好難反映到真實水平,因爲當地有好多大學,對比香港又唔算好高級數,之係比個名你,你都唔識睇究竟係咪名校,所以一個實際方法係安排付費測試(paid trial),我自己試過付費一星期(US$200),提供基本培訓,第五日有一個詳盡既測驗,睇下應徵者學唔學得識。

咁個測試喺邊度黎?

我用錄影軟件(Loom / Monosnap),錄左我個網站點樣用,有咩步驟有咩掣要㩒,解釋成個流程係點,最好你自己做一次教番佢點做,第一至第五日有唔同既教學。我將每日既培訓內容放左喺一個Notion page,方便佢自己睇番,同埋我可以持續更新,每日睇完所有錄影仲有一個小測試。

我另外有用Notion 設立客服playbook,將常見既問題加入去再分類,你可以當係公司既Standard Operation Procedure (SOP),咁樣每次有新同事加入,都唔需要重頭培訓。

成個請人流程搞好耐?

又唔算既,係篩選CV 比較晒精神,用chatgpt加 filter應該可以加速篩選應徵者。

  1. 去onlinejobs.ph 出廣告
  2. 2日收CV (> 100)
  3. 用Google Form基本測試搵左3個應徵者
  4. 要求每個應徵者錄影介紹自己,我需要了解英文口語水平(3個 => 2個)
  5. 剩下2個應徵者做付費測試 (US$200 x 2)
  6. 安排Google Meet 會談,最後選左一個應徵者做員工
  7. 叫chatgpt幫手出僱傭合約

如何出糧比海外員工?

可以用Wise或者PayPal匯款,由於PayPal匯率太差,Wise是比較適合的選擇,可以用香港銀行戶口轉賬港元至Wise的香港銀行戶口,同事會在一小時內收到菲幣(PHP)匯款;如果以美金出糧,當地銀行會收較高手續費(個人經驗爲~8%),需時1 – 3天,據當地銀行的說法是透過Swift 匯款較慢,我理解爲當地銀行見係美金外匯,所以食水好深。

Wise 轉介連結

除左客服,可唔可以請其他職位?

一樣可以,最普遍係管理社交媒體帳戶,管理網店,管理電郵戶口等等;據說美國人最喜歡請菲律賓員工作爲私人秘書,管理電郵,安排不同會議,節省時間成本又平。

仲有咩要留意?

要問下應徵者既電力同互聯網快唔快,穩唔穩定,我試過員工個互聯網連綫突然斷左,搞到要停工一天,斷綫都係當地一個普遍問題,所以要問清楚少少,因爲當地ISP既服務水平唔係咁穩定。

如果想請通宵更都可以,方便支援歐美客戶,當地人叫graveyard shift,人工要出高啲,但係要返通宵更一定無咁受歡迎。

至於需唔需要每年調整人工,就睇你自己啦 😉

點樣透過互聯網找到你的頭10個客戶

Facebooktwitterlinkedinmail

首先你要理解邊啲人係你既目標客戶,而佢地會喺邊度出現;以我自己賣網店插件 (Shopify App) 爲例,我既目標客戶主要係Shopify 網店,對套裝功能好有興趣,最緊要係肯課金解決問題,口爽荷包立係係無用既。所以我最初係集中喺Shopify Community,之係Shopify提供畀網店主用既討論區,好多新手上路都會喺度搵人幫手。

邊個問相關問題又好有迫切性,咁佢地就係我既客戶喇,要去討論區開個post,打一大段野咁麻煩都肯做,明顯已經有動機想試下新野。如果個問題隔一排重覆出現,咁證明無現有方案可以有效解決問題,但係有好多人都有一個共同問題想解決;但係肯唔肯畀錢,又係另一件事。

我自己主要集中喺歐美客戶,如果你既目標客戶無一個集中既討論區,你都可以去

  1. Facebook groups
  2. Subreddits
  3. Twitter
  4. LinkedIn

甚至連登討論區都可以架,重點係佢地肯試新野,又肯畀錢解決問題。有時甚至可以去現有產品既討論區,如果搵到好多客戶對同一個問題好不滿,咁可能係一個好既切入點比你搵新客戶。

我搵到好多Post講我既問題,但係我點樣知道佢地肯唔肯畀錢?

好多討論區都有規矩,限制你唔可以spam,唔可以post link去宣傳自己既產品,所以千祈唔好sales上身,係咁叫人試用你既產品,最後好大機會會被用戶檢舉封鎖你既帳戶。將心比己,你自己都唔鐘意被人sell,咁你都唔好咁hard sell喇。

可以試下改變下方向,例如同佢講,你宜家開發緊一個產品,想請教下佢地既意見;或者你自己都可以開post,話自己啱啱畢業好細個,用左好耐開發左個產品,想問下其他人自己既產品唔知好唔好用呢,諗下有咩方法可以吸睛,提高到讀者既興趣去回覆你既主題,有冇現有產品喺手並唔係重點。反而你應該了解客戶宜家點樣解決問題頂住先,點解個問題咁困擾等等。

如果去到最後,個人肯留個聯絡甚至畀少少錢都肯既,咁就一定係成功啦,同一時間你對自己既目標客戶,會有一個更清淅既概念,了解客戶背景就係創業成功既第一步。

沒有好橋,可以怎樣找到一個可行創業大計?

Facebooktwitterlinkedinmail

如果無橋,係咪代表唔可以創業呢?

答案當然係NO,無idea 一樣可以用有系統既方法搵到你既創業大計;作爲一個科技創業者,我自己試過不同的方法去實試唔同idea,有啲可行,有啲完全失敗,但係要搵一條賺到錢既創業概念,係完全可行,一個普通人都做到。

有咩方向可以搵到你既idea?

  1. 從自己既問題出發
    如果你以往既工作曾經遇到一些問題,你自己又好想解決既,咁可以研究下有冇現有方案。如果你可以搵到現有產品解決你既問題,有一個市場存在,咁你既idea 已經證實左係可行,因爲有一堆客戶畀緊真金白銀買一個解決方案,問題係你有冇一個切入點去進入市場,好似特別既功能,介面簡單易用,特別技術,甚至係你認識好多現有客戶 (Network),可以短時間內打入市場。

    如果你既問題搵唔到解決方案?咁你要睇下點解會無人做呢?互聯網去到今時今日已經好發達,你諗到既idea,好大機會有好多人已經諗過甚至試過實行,咁點解會無人做呢條橋,有咩阻力存在?會唔會係無人肯畀錢去解決問題,個個都係口爽荷包立?如果你搵到個阻力,係只有你先可以解決到,咁可以去下一步測試下有冇得做
  2. 從別人既問題出發
    我自己都唔係擅長從自身搵創業好橋,因爲好多問題都可以自己用技術,或者work-around 解決,好多問題我自己都唔覺意忽略左,過一段時間又會見到有新創提供解決方案。

    咁我點樣搵到做SaaS 產品既idea?當我做第2個Shopify app之前,我用左大約3個星期時間去瀏覧Shopify community (註:一個開網店平台既用戶論壇),每日我都睇下用戶有咩問題,有咩問題值得留意,有咩問題有客戶好想付費解決;有咩問題同我自身背景有關聯,有優勢去創造一個解決方案;有冇現有解決方案;現有市場競爭大唔大,競爭對手強唔強,自己一個人有冇可能打得入市場,勝算有冇6,7成;問題重覆次數多唔多,如重覆次數多又有用戶肯付費,咁就代表你已經搵到一堆潛在客戶,可以有辦法賣到錢。

    如果你未做任何實際開發工夫,而你已經搵一堆潛在客戶肯幫襯,咁你失敗既風險已經降低左好多;未做先賣,可以立於不敗之地。

真係諗唔到idea,咁可以點?

真係搵唔到好橋,仲可以抄人地條橋,你有錢都可以收購現成既小型產品,慳番唔少時間; 有人話抄人橋咁咪好卑鄙?咁百佳惠康開到周圍都係超市,唔通我唔可以開超市咩?人地做得,點解我又唔做得,咁我又犯左咩法?侵犯版權?咁我自己用自己方法從新做一個改良版本,侵犯左咩版權?

“Good artists copy, great artists steal.”

Steve Jobs 同Picasso 都係咁話,無人話一定要好創新,先叫新創架

點樣確保可以成功到第一步,搵到頭10個客?

下次有機會再講下點樣減低產品風險,好似Small bets 概念,12 Startups in 12 months,點用Life Time Deal (LTD)預售產品,問客戶籌集第一桶金。

無錢?唔緊要,仲可以空手入白刃 😛

搞Startup 一定需要天使投資者嗎?

Facebooktwitterlinkedinmail

最近上連登討論區睇到呢個主題,想討論一下:香港搞startup幾乎冇angel investor

究竟創業需要巨額資金嗎?一定需要搵投資者支持嗎?

如果你係創立一個高資金門檻既生意,好似開茶餐廳要投入資金去租金裝修請員工,要投入資金買材料買機器,咁係的確有需要外求資金。

但係如果你創立科技生意好似SaaS (Software as a Service),一個月成本講緊只係幾百蚊,包括伺服器,電郵,域名等等,最大支出只不過係你自己既人工。起動資金可能一,兩萬蚊已經足夠玩一年;前題係你自己要有基本動手能力,咁如果你乜都唔識既話,我建議你應該提升一下自己既動手能力,再考慮下一步發展。

謎思 1:伺服器,原料好貴?

時下伺服器成本已經大幅下降,你可以用Digital Ocean (DO), Hetzner, Linode, Vultr 等雲端伺服器供應商,以一部1 vCPU, 1GB RAM, 25GB SSD 的伺服器爲例,DO一個月收費爲$6美金,足夠運行一個小規模網站,如你的MVP 或示範應用,每個月畀一餐飯既價錢已經足夠。Microsoft都有Microsoft for Startups program,提供credit 可以兌換伺服器或者訓練AI 的GPU額度

如果你的公司爲新創,某啲雲端伺服器供應商都有設立新創支援計劃,申請成功可以得到一定的credit 在2年內使用,我自己有用過Aws / Digital Ocean的新創計劃,等如頭2年免費設立伺服器。

除左伺服器,軟件開發無咩原料硬件成本,最貴應該係你自己用黎工作既電腦,同埋你自己既人工同埋時間。

謎思 2:App開發人員成本好貴?

第一件事,要問下自己點解要一定開發App?點解要分開搞iOS/Android,搞左一個iOS平台先得唔得呢?用一個網頁取代得唔得?點解一定要開到咁大個頭?

凡事問多d what-if 自己係錯咁點,用反向思維,如果用一個低成本既方本可以達到目標,慳到時間,咁係咪一定要用一個高成本既方法呢?如果真係要用做晒iOS/Android,又有冇辦法可以搵到早期客戶補貼早期開發資金呢?

如果你覺得香港生活成本好貴,有冇考慮去外國旅居一段時間,減輕生活成本?外國有好多數碼遊牧 (Digital Nomad)居住喺泰國,印尼,越南等等,每個月生活成本爲幾千蚊港元,已經足夠生活,有興趣可以參考Nomad List 睇下外地旅居既生活成本。

謎思3:香港無VC?無天使肯投資?

如果你覺得香港無適合既投資者,咁咪唔好搵投資者,可以用Bootstrap (資金不求人) 既方法去達到最低生活水平,外國bootstrap創業者叫呢個目標做Ramen Profitability,意思就係每餐食杯麵支撐到既收入水平,邊個話搵投資者搞到上市係唯一既創業方法?點解一定要跟人地既方法?

結論

如果你睇到呢度都覺得一定要搵投資者,我會建議你唔好搞呢條橋,轉去另一條平靚正既橋,因爲搞startup最緊要有Founder-Market Fit,條橋未開始都咁棘 (Kick),咁不如搵另一條易行既好橋啦,世事無謂勉強

一個人在香港可以創業嗎?

Facebooktwitterlinkedinmail

有好多人話香港創業成本高,舖租人工高,好難發展。咁今時今日一個人創業,仲有冇可能成功呢?

我自己覺得可以,前題係

  1. 必須選擇利潤高的範疇,如SaaS (Software As A Service),digital products,電子報等等,利潤高代表你不需要太多客戶都可以養活自己,做少啲野,但係可以收多啲錢;70% – 90%利潤係合適既水平,10% – 20%利潤既生意代表你得個做字,無咩錢落到袋
  2. 繼承1,利潤高之係要有低營運成本,唔駛交貴租貴裝修
  3. 必須有自己既門檻或者細分市場,有Founder-Market Fit,有自己諗法無咁易被人抄到,至少唔會有成條街既競爭對手同你做爛市
  4. 有槓桿(Leverage),由於一個人時間有限,唔會夠時間做晒所有工作,代表你要放棄營銷或者產品的一剖分;如果選擇放棄一部份營銷工作,可以選擇加入現有平台如Chrome Web Store, Google Play, Apple AppStore, WordPress Plugin Directory等等。利用現有平台流量,節省自己經營時間,如果自己一個人要兼顧營銷, 產品研發加埋其他營運問題,太難喇

係咪一定要raise fund(集資)呢?

第一件事應該問你自己點解要集資?如果你想一個月賺到幾十萬港元,咁自資係絕對無問題嘅,只要你肯接受頭一,兩年緩步發展。如果你要集資,代表你一定要畀回報投資者,你一定要賣盤或者上市,否則你點畀回報投資者?

有呢啲咁好idea咩?

都有好多架,好以呢個BoringCashCow 網站,外國有好多獨立開發者(indie developers),一年都可以做到六位數美金營業額,重點係選擇比努力重要,選擇一條自己比人跑得快既跑道

除左BoringCashCow, 亦可以加入IndieHackers 做會員,睇下其他外國人點樣可以低成本創業,刀仔鋸大樹

咁我諗唔到好橋咁點呀?

咁咪唔好諗囉,直接收購現有產品,或者抄人概念再快速發大黎做,等如人地喺街市賣豬肉,無理由唔畀我賣埋一份架?我想賣全天然既健康豬肉產品又得唔得呢?