創業最痛苦係幾時? 生意差個陣?
對我黎講係唔上唔落，唔知做咩好，搵唔到出路個陣。因爲做咩都好似無咩改進，而且無人可以話比你知點解；創業唔係考試，唔係所有問題都有明確答案。
喺呢個時候，可以試下用另一思維模式去思考：
例如， 我會試下用數學既思考方式，數學係以公理(Axiom，之係一定啱既命題)， 一個一個公理咁樣砌上去，最後得出一個啱既結果。
做生意一樣， 集中喺一定啱既工作，一項一項工作咁既做，假以時日，會得到一個理想既結果。例如，改善客戶服務，幫助客戶成功使用你既產品；更新系統， 提升系統表現及穩定性；做好基礎市場營銷， 令到客戶更容易可以搵到你既產品等等。
反向思維
與其諗做咩工作可以更進一步，可以掉轉諗 ；唔好做錯事， 就可以減少損失；減少損失， 就會累積更多金錢。
如果我知道自己死哪裡就好了，那樣我就永遠不去那個地方
—查理·．芒格
唔好令到客戶畀一星負評，你就會得更高評分， 更多客戶推薦。 唔好令到產品無故出錯，你就可以提高產品穩定性。
加快或減慢步伐？
有時生意好似一部車，本身行得順， 可以再加速上去更高速度；相反，如果油門有問題，行車有啲卡，咁應該減速，檢查部車睇下有咩零件壞左，更換番壞左既零件，再從新上路。如果強行加速，只會得到炒車既結果。
做生意都係一樣，以我自己爲例，好多客戶下載完我既SaaS軟件產品，短時間（１小時）內會立即缷載。有咩原因？ 可能係產品頁面說明不清，下載後唔識用產品，介面太複雜，客戶支援太慢（難以實時支援美國時區）， 找不到相應功能，有bugs 等等。好多時都無一個明確答案，客戶缷載後都不屑回應， 唔知係咪太失望。
與其多做新功能，減慢步伐，查找不足， 改善新客戶使用流程，使用自動回覆加快客戶支援， 都可以提高客戶體驗。
＝＞與其賣廣告增加新客戶， 不如減少現有客戶流失， 你就會得到更多忠誠客戶。
雖然好似非洲每６０秒過左一分鐘； 但係長期保持做對的事，你就會得到對的結果。