之前玩Threads見到有創業者批評，香港新創公司好難集資(raise fund)，本身天使投資者已經唔多，政府資助好似數碼港CCMF，得10萬港元又審批得好慢，咁少錢好難生存，捱唔得耐等等。
作爲Bootstrap獨立創業者，我自己有成功申請過科學園科培計劃(Incu-Tech)，同埋創新科技署既資助，但係申請唔到CCMF既資助，所以都好明白政府資助既難處。
政府資助的最大問題
就係浪費好多無謂既時間去填表，搭車去開會，去網頁睇一堆申請要求；新創公司最寶貴既係時間，當你既專注力浪費左去無謂既行政工作上，基本上係加快自己死亡既進度，最慘舊錢仲要咁少，都唔夠洗幾個月。
私人集資？
如果你唔係咩名校，有特殊背景，或者有現有用戶或者客戶，香港好難搵到天使投資者幫你，就算有咁好彩，條件都唔會吸引； 如果你有富爸爸，咁就另作別論。
咁仲有咩方法？
- 做一次性收費產品
做唔到複雜既SaaS 軟件產品，咁點？咁咪唔好做囉，將產品簡化，縮短個開發時間去將就，例如你可以整個Mac app 收一個價US$99，價錢平左，反而可能多左人幫襯，每個月賣到20-30個客，都夠開飯啦；同一時間仲可以吸收經驗，睇下點做營銷工作。 - 做freelance 接project 糊口？
香港地做project 錢唔多，無論設計或者軟件開發項目都係一樣，手尾長麻煩客戶又多，改黎改去浪費精神時間，所以我唔建議接project，根本上係浪費人生。 - 發佈Life Time Deal (LTD)
除左開發硬件可以上Kickstarter集資，開發軟件一樣可以用Appsumo 集資，Appsumo 係一個LTD平台，打包SaaS月費軟件以一次性收費吸客，例如有個新出既SaaS軟件本身收US$49/m, 宜家佢出一個LTD $199買左可以永久任用，有堆客覺得好抵咁咪會試下囉，又唔會有咩事嘅。
咁你問Life time 去到幾時？呢個無一個絕對定義，我理解爲間公司生存既時間爲life time 。
LTD對Bootstrap創業者有咩優勢？
- 唔駛出賣股權，直接問客戶收費
- 由於你係問客戶收費，你可以直接驗證你既概念成唔成立 (Idea Validation)，市場反應一目了然
- 可以快速建立早期用戶社群，呢個對於0 -> 100係最重要，因爲有早期用戶畀意見你改進產品，可以達到快速迭代產品周期。
- 由於佢地係買Life Time Deal, 佢地一定唔想你短期內執笠，所以一定會畀好多意見你改進。
- 直接面對海外客戶，打入海外市場，唔需要面對本地市場低迷。
相對有咩壞處？
- LTD平台會收取30 – 50% 抽成，費用係貴。
- 由於呢堆客戶係貪平而買，所以佢地既要求可能會變得唔合理。
- LTD係招徠左一堆特殊用戶，可以當係VIP，因爲佢地係無任何現成產品都課金支持；所以就算之後加價，都好難對LTD客戶額外收費，只可以grandfather左佢地，否則會引起法律問題。
有冇成功例子？
好似呢個叫Lemlist既Cold email outreach 工具都係透過Appsumo 發佈產品，籌得第一桶金後快速發展； 根據lemlist 官方網站，最新營業額已經突破US$20M ARR。
p.s. 本人和Appsumo 沒有進行任何商業合作