願望成真基金幫助患有重病的兒童實現願望，希望透過『願望成真』的體驗令他們的人生充滿盼望、毅力及歡樂。更多資料：http://www.makeawish.org.hk/
Chinese So Happy 2016
Chinese So Happy 2016目標為幫助少數族裔小朋友融入香港生活。科大校友會義工將會幫助他們和本地朋友溝通，設立個人目標，建立正面價值觀，如有興趣報名，可留意Facebook 活動頁面：https://www.facebook.com/events/1641350836143557/ 或聯絡Ronny Hui at ronny.hui@ustaa.hk
探訪保良局兒童
仲記得以前有助養過保良局兒童, 今次再去係作為義工既做身份做探訪, 同十幾個小朋友玩估生果遊戲; 忽發奇想, 如果有一日可以每年將公司營利既一個百份比(1%?)捐畀慈善機構, 持續支援有需要既群體, 咁就好喇! 🙂
基層兒童成長攝影展《寶貝‧十年》 Our Treasure – Ten Years Later
得閒去左香港社區組織協會 Society for Community Organization搞既基層兒童成長攝影展《寶貝‧十年》，以前都有做過呢個組織既義工，幫助一啲深水埗區既基層兒童；呢個攝影展追蹤10年前既受助人，再喺今日對比佢地既生活變化，分享貧窮孩子為實現夢想而努力和蛻變的生命故事；我去到既時候場內無咩人，可能係活動宣傳不多吧。
攝影展主要拍左唔同受助人既故事，細細個已經要執紙皮，賣汽水罐，輟學出社會工作對我黎講難以想像。
上圖何太是組織既義工，感概地表示香港大學校友義工幫佢教好３個女兒，改變一生既命運。平時接觸都係生意佬比較多，講黎講法最多係話生意差左，要跑多啲數。見到基層朋友面對巨大困難都一樣樂觀面對，就會發覺其實每日面對都係一啲無關痛癢既小事，雖然逆境一時三刻無法改變，但係只要努力做好自己，終有一日可到達彼岸。今日學到既一課都好有意義，令我記起以前幼稚園既往事。
希望傳媒可以撰寫多啲正面既新聞予公眾參考。:-D
基層兒童成長攝影展《寶貝‧十年》：https://www.facebook.com/events/505717166251071/permalink/505723582917096/
與G.O.D.創辦人Douglas Young吃飯
有機會同Goods of Desire (G.O.D.)創辦人楊志超Douglas Young同枱食飯因為參加左一個新既非牟利服務叫Time Auction，呢個服務畀你用做義工既時數交換與社會傑出人士食飯既機會，形式好似每年股神巴菲特都會拍賣一個聚餐機會，所得收益捐出作益善用途；而Time Auction則鼓勵參加人士直接服務社會，換取會面機會。我就用左12個鐘義工時數換取，今次聚餐已經係第三輪活動。
服務由兩位女生Fion Leung及SuetYi Wong創立，2014年6月開始第一輪導師聚餐，過往導師包括多位企業家如9gag創辦人，Google HK執行董事等。
會面地點為G.O.D.在賽馬會創意藝術中心（JCCAC）辦公室附近的餐廳，環境幽雅，午餐時份人流唔算多，不過我掛住聽人講野，食物水平冇咩留意到。
聚餐人士包括不同界別，如實習大學生，iBanker，建築業人士……嗯，上圖我坐左喺螢幕死角。食完飯去左G.O.D.辦公室參觀，設計師Studio果然比IT公司更有個性，雖然同我公司一樣都係好亂，哈哈。
Douglas仲好大方分享佢既設計理念，公司方向，對前景睇法，我最感興趣係Douglas既設計過程，點樣對唔同點子作篩選，雖然產品設計同軟件設計唔同，但係我相信設計道理都係一樣，由其他前輩分享設計心得再融入我既軟件設計思維，係一個好難得既學習機會；經過20年努力仲肯同後輩分享成果，我對Douglas深感尊敬，希望有機會可以再請教，亦希望G.O.D.可以再上一層樓，揚威海外。
G.O.D.產品固然傑出，但係背後既精神、付出、堅持更值得學習。
希望之後有機會再參加其他Time Auction聚餐，我都要努力工作，Delay No More!
註：以上圖片除了第2張外，版權均屬於Time Auction，來源:Time Auction Facebook Page
註：第四輪聚餐將於9月開始拍賣，有興趣可以登記為會員，並紀錄義工時數。