創業新手一般以爲所有事情都要做到最好，公司就會經營成功，例如產品品質要做到最好，比競爭對手好，包裝/網頁要做到最靚，甚至乎一個logo都要整到最突出，產品開發要用最新最先進既技術，殊不知呢個係一個死亡陷阱。
當你每個範疇都追求最好，自然會令成本上升，最後超出預算。最慘係用多左太多時間；錢可以搵得番，而時間係搵唔番，所以時間一定係重要過錢。產品上市時間 (Time to market) 係其中一個重要考量。
❌ 時間就是金錢
✅ 時間 > 金錢
以我自己的網店軟件產品 BYOB 爲例，到今日營運左2，3年，都係無官方網頁，只有用ghost去設立一個BYOB官方博客，每個月US$9，設計仲用緊現成模版。
咁點解唔用Wordpress，自己設立一個Wordpress博客唔係最平咩？但係維護一個伺服器既成本好高，例如我自己要更新作業系統，ghost版本，備份數據庫，一年下來浪費不少時間，我好肯定消耗既人工係超過一年$9 x 12 = US$108。
重點係我唔需要一個好精細既官方網站。
=> 所以購買官方寄存係最佳方案。
另外，我既開發技術都係最悶既，用最基本但係一定work既方法，新技術我無考慮過，一來因爲我唔識 ，哈哈，二來因爲我唔夠時間學，我只需要開發一個最小可行的產品 (MVP) 就可以啦。
記住你宜家唔係考試，唔駛攞100分，攞70 80分已足夠喺市場立足，無人叫你搞到所有野都咁完美最先進，你唔係Elon Musk，唔需要整支火箭射上太空；另一方面， 市場上好多對手都唔係你想像中咁勁，就算係外國人都唔係天下無敵，你只需要一個好的市場定位。
有技術負債將來要還？
如果公司無收入既話，講技術負債係無意思，因爲你連下年都唔知過唔過到。唔需要因爲人地係咁做，你又要跟住人地咁做，你只需要按照自己步伐去行就可以喇。
=> 對於軟件公司創業初期黎講，最簡單既做法係最有效率
咩叫做最簡單既做法？
- 1. 最快可以搞掂，慳時間
- 2. 唔駛請外人幫手
- 3. 盡量用現成技術, 拒絕重頭開發 (Do not reinvent the wheel)
我的做法：
設計: 用Tailwind CSS / Theme forest 買模板
元件庫: Tailwind UI / Shadcn
Logo: 用ai 生成或自動化設計服務如Brandmark.io
Icons: Emojis
如果覺得現有方案好似太複雜，可以試下退一步諗下， 會唔會有更簡單既做法， 可以做到類似既效果? 如果諗唔到，仲可以試下問Chatgpt / Claude.ai，話唔定可以幫到你。
